Kapag suka ang naging sandata ng karagatan

Sa ilalim ng mga alon ng Badian, Cebu, isang tahimik na laban ang isinasagawa laban sa Crown-Of-Thorns starfish o COTS na unti-unting pumapatay sa mga bahura.

Isang Cebu vlogger na si Bonifacio Jomio ang tumutulong sa pagkontrol ng pagdami ng crown-of-thorns starfish (COTS) sa pamamagitan ng pag-inject ng suka ng niyog o tuba sa mga ito habang siya’y sumisisid.

Sa bawat pagsisid, dala ni Bonifacio Jomio ang isang hiringgilyang may lamang suka ng niyog o tuba, na kanyang ini-inject sa mga starfish upang hadlangan ang patuloy nilang pagkain sa mga coral.

Ang COTS, na may siyentipikong pangalang Acanthaster planci, ay malalaking isdang bituin na may 10 hanggang 21 braso na nababalutan ng matinik at makamandag na tinik.

Sa loob lamang ng isang araw, higit limampung COTS ang kanyang nasasalubong sa dagat, dahilan upang ituring na peste ang naturang organismo sa ilang bahagi ng Badian.

Kapag hindi napigilan ang ganitong outbreak, nanganganib na tuluyang mamatay ang malalawak na bahagi ng bahura na mahalaga sa buhay-dagat at kabuhayan ng komunidad.

Ayon sa mga dalubhasa, ang tusok ng naturang starfish ay maaaring magdulot ng pamamaga, matinding pananakit, at agarang reaksyon sa balat.

Direktang kinakain ng COTS ang buhay na coral, at bagama’t bahagi sila ng natural na ecosystem, nagiging mapaminsala sila kapag sumobra ang kanilang bilang.

Mas mabilis ang kanilang pagdami dahil ang isang babaeng COTS ay kayang maglabas ng milyun-milyong itlog, habang patuloy namang nababawasan ang kanilang mga natural na kaaway tulad ng giant triton snail.

Dahil dito, mas marami ang corals na kanilang nauubos kaysa sa kayang mabuo at lumaki muli ng bahura.

Napansin na rin ni Jomio ang mga lugar na nagsisimula nang pumuti ang coral, na siyang nagtulak sa kanya upang kumilos matapos makita ang mga katulad na hakbang sa ibang baybayin.

Ipinapakita ng mga pag-aaral na ang suka ng niyog ay epektibo sa pagkontrol ng COTS at hindi nakapipinsala sa ibang lamang-dagat.

Kapag ang suka ang naging sandata, ang karaniwang sangkap sa kusina ay nagkakaroon ng bagong saysay bilang sagisag ng paglaban ng tao sa tahimik ngunit mapaminsalang krisis sa karagatan.