Dear Jepoy,

Salamat kaayo sa…

Tulo ka pulong-an nahabilin sa yanong papel

Sama sa iyang sakripisyong gikumkum sa panyel

Didto ra gyud kutob an tinta,

mga panultihong wa na humna

kay napalngan na sa suga.

Kalit ko nakapangutana sa hilom:

unsa kaha ang kinatibuk-ang tudlom,

Bisan man lang sa tibuok nga pulong

Taman sa pinakaunang tudlok.

Apan samtang gisubay ko ang matag letra

Nitulo ang luha sa akong duha ka mata;

Kay gihubad sa akong kamingaw ug kasubo

Nya akong kasing-kasing nagsugod na’g pangutlo.

—

Dear Jepoy,

Salamat kaayo sa….

Kining mga pulunga, dili mawad-an ug gahum

Kay ang mga letra na kun basahon, matahum.

Apan gibuo sa gugmang puro ug lalum

Ug sa matag kalisod na gipangumkum.

Kay ang iyang simple na pagpasalamat

Dili na kinahanglan ipaagi pa sa sulat

Kay adlaw-adlaw na niyang ginabuhat,

Naningkamot luyo sa kabug-at.

Salamat — naa sa iyang gikapoy nga lawas

Nga bisag luya na padayon gihapon sa paglatas

Salamat — naa sa iyang matag biyahe

Nga sa kapit-os sa kinitaan, nidupa pang labihan

Salamat — naa sa nagkataas na presyo sa gasolina

Apan mahimo gihapon nga may sud-an sa lamesa

Salamat — naa sa mga kasakit na iyang gitago

Bisan an pantawhanong kusog naanam nag kahurot.

Busa…

Sa mga anak na sama ni Mac-mac

Dungga ninyo ang hulas nga nagtagak

Sa inyong mga amahang namatak.

Kay sa ilang mga mata, walay palpak

Apan paglaum nga hinay-hinay nagkapakpak

Aron dili basta sa hangin malagpak

Sa mga Dodong na labing pinangga

Atong amahan, sa hilom lang mupangga

Gipatuyangan ta bisan bulsa buslot na

Pagtan-aw nila sa ato bililhon

Maong ilang pagpaningkamot angay na ilhon

Sila atong mga amahan nga bakakon:

Dili na sila musulti nga naglisod,

Mubarog sila sa kahilom nga may pahiyum

Atong pagtuo nga sa sila permi lig-on

Dili kumpyansahan basig mao na to

Ang katapusang pagbangon.

Ug sa mga sama nako, si Jepoy

Sa atong kasuko di kita magpalamoy

Di ta umhan ang paghuna-hunang manomboy

Wala ta laktawi sa gugma sa atong amahan,

Dili nato makita ilang panyo na hinilakan

Kay ilang kahuyang ilang ginataguan.

—

Dear Jepoy,

Salamat kaayo sa…

Oo pa, ayaw na humna

Kay kumpleto ug buo na siya,

Dili na kinahanglan dungagan pa.

Salamat kaayo, papa.