DOF, DBM: Walang pondo na nakalaan para sa Pax Silica 

Kinumpirma ni Department of Finance (DOF) Secretary Federick Go at Department of Budget Management (DBM) Secretary Kim Robert de Leon na walang nakalaang pondo para sa Pax Silica sa National Expenditure Program (NEP). 

Sa House Budget Deliberation nitong Agosto 17, binigyang-diin ni Go na wala pang napipirmahang opisyal na dokumento kaugnay ng paglalaan ng badyet para sa Pax Silica. 

“Nothing has been signed yet,” saad niya. 

Nilinaw rin ni De Leon na gagamitin sa pagpapatupad ng e-government law ang badyet na inilaan sa Department of Information and Communications Technology (DICT), at hindi para sa Pax Silica. 

“[I] just wanted to confirm na wala pong any allocation in the NEP (National Expenditure Program) intended for Pax Silica. The amounts mentioned by the good congresswoman under DICT is intended for the implementation of a new mandate under a law enacted by Congress, which is the e-government law,” giit niya. 

Bago nito, ibinahagi ni Gabriela party-list Representative Sarah Elago ang kanyang mga alalahanin ukol sa umano’y pagtaas ng pondo ng DICT para sa digital infrastructure development, dahilan upang linawin ito ni De Leon.

Dagdag pa rito, iginiit ni Go na nananatili pa rin sa paunang talakayan ang Pax Silica, isang US-led initiative na sinalihan ng Pilipinas noong Abril ngayong taon. 

“This industrial hub is a proposed industrial hub. So one thing’s for sure. There’s nothing in the budget that will spend for this proposed industrial hub because nothing has been signed po. So it’s still a discussion. So I’m pretty sure the DBM will not put any budget line item– expense line item for something that is in very preliminary discussion,” pahayag niya.

Bukod pa rito, isinaad ni Go na hindi rin kakailanganing maglabas ng pondo ang pamahalaan kung sakaling simulan ang pagpapatayo ng Pax Silica sa Pilipinas, sapagkat US ang magbabayad ng upa sa lupang pagtatayuan nito.

Ayon sa mga ulat, pinaplanong itayo ang nasabing proyekto sa New Clark City, Tarlac, at tinatayang aabot sa halos 1,620 ektarya ang magiging sakop nito. 

“To clarify, if indeed an industrial hub will be built in New Clark City, there’s no budget requirement from us. They will pay us rent. So it is a revenue-enhancing project. I’m not aware of any budget requirement that it might entail,” giit ni Go.

Samantala, ibinahagi rin ng ilang mambabatas ang kanilang hinaing tungkol sa pinaplanong industrial hub dahil kaakibat nito ang matinding pagkonsumo ng tubig at kuryente sa bansa.