bukas makalawa, sana bukas magaan na

Micah

okay lang na walang makain, basta kasama kita 

kuntento na sa daing at kutsinta, basta magkasalikop ang ating mga paa

sa pasko, hindi na natin alintana ang lamig 

sapat na rin ang pan de leche bilang handa 

dahil wala tayong limang daan, pero ayos lang kasi kinakagat naman natin ito bilang alay ng pagmamahalan 

pero naisip mo rin ba,

kung salop ng kaliwang kamay mo ang kanan ko

maaangkin natin ang pasko?

makakalaya ba ang bawat sulok ng katawan ko sa kumot ng kahirapan? 

iyong tipong hindi na ako hahamugin 

dahil hindi na karton ang bahay natin

hindi na tayo nakikipag-usap sa kalye

at mga regalo na ang ating binubuksan sa halip na mga tirang pagkain 

kinumpleto ko ang simbang gabi 

at ang wish ko lang: kung hindi ko man maukit ang pag-ibig ko sa balat mo bilang tanda na umabot tayo sa pasko, sana makapulot nalang ako ng limang daan 

para mabili ko ang noche buena na sapat sa hapag

hindi naman masama ang mangarap 

wala ring batas kay Santa na may hangganan ang antas ng mga bagay sa wish list ko 

malay mo, bukas makalawa, 

maabot natin ang rurok ng saya sa pasko

at hindi na tayo makukuntento sa tira-tira

matututunan na nating maging ambisyosa 

hindi man ngayon, pero baka sa susunod pa

malay mo, bukas makalawa

limang daang pan de leche na ang nasa mesa