Canillo, Hernani sumungkit ng ginto; Region 10 nagmina ng 5 medalya sa men’s boxing

Nagpakawala ng matitinding bira si Region X–Northern Mindanao boxer Steve John Canillo upang dominahin ang laban kontra Region V–Bicol Region bet Dithrone Subion sa pamamagitan ng unanimous decision, daan para masungkit ang gintong medalya sa U17 pinweight division ng boxing competition sa Esperanza Covered Court, Mayo 30.

Lumusot naman si Region X–Northern Mindanao bet Jaervi June Hernani matapos ang isang thriller match kontra kay Western Visayas boxer Reu Tubongbanua upang maibulsa ang ikalawang gintong medalya ng rehiyon sa pamamagitan ng split decision sa U19 bantamweight class.

Bagama’t kinapos si Cagayan de Oro pug Airon Greg Badiang laban kay Central Visayas boxer John Rio Joren, sapat pa rin ang kanyang ipinakita upang maiuwi ang pilak sa U15 pinweight division.

Nagbigay rin ng matinding hamon si Northern Mindanao boxer John Albert Bersabal ngunit kinulang sa dulo kontra SOCCSKSARGEN fighter Jarrell Mark Ancajas sa kanilang U17 Flyweight showdown, dahilan upang madagdagan pa ng isang silver medal ang medal haul ng rehiyon.

Sa isa pang finals clash, hindi nagpatinag si Region X fighter Paul Jake Jugarap, ngunit hindi naging sapat ang kanyang opensa laban kay Region XII boxer Ralph John Calibayan, na nagbigay sa Northern Mindanao ng ikatlong silver finish sa torneo.

Bagama’t nasa ika-pitong puwesto lamang sa medal tally, nag-iwan ng marka ang Region X–Northern Mindanao sa men’s boxing matapos makasungkit ng limang medalya at patatagin ang kanilang kampanya sa Palaro.