‘Risa Na’ movement, inilunsad sa Negros para sa posibleng 2028 presidential bid ni Hontiveros

Christia Chloe Amarilla

Humigit-kumulang 3,000 Negrense ang nagtipon-tipon sa Bacolod City noong Hunyo 28 upang pormal na ilunsad ang “Risa Na” movement, isang grassroots campaign na naglalayong palawakin ang suporta sa posibleng pagtakbo ni Sen. Risa Hontiveros sa pagkapangulo sa 2028.

Pinangunahan ng iba’t ibang volunteer groups, civil society organizations, at mga kasapi ng Akbayan Party ang pagtitipon, na nagsilbing isa sa mga kauna-unahang malawakang pagkilos na hayagang nagsusulong ng suporta sa posibleng kandidatura ng senadora.

Bagama’t wala pang opisyal na deklarasyon si Hontiveros hinggil sa pagtakbo sa pinakamataas na posisyon sa bansa, sinabi ng mga organizer na layunin ng kilusan na simulan ang pagbuo ng suporta sa antas ng komunidad bago ang susunod na pambansang halalan.

Ayon kay dating Negros Occidental Board Member Mardi Mapa-Suplido, panahon nang magsimula ang maagang pag-oorganisa upang makapaglatag ng isang malawak na people’s movement na nakasentro sa mabuting pamamahala, pananagutan, at integridad sa serbisyo publiko.

“The Filipino people should not elect a leader who comes from a family that engages in extrajudicial killings, steals from the nation, and lies,” tugon ni Mapa-Suplido.

Sa isinagawang pagtitipon, lumagda rin ang mga dumalo sa isang manifesto na nagsusulong ng responsableng pamamahala, paggalang sa karapatang pantao, disenteng kabuhayan, at mas inklusibong pamahalaan.

Inanunsyo rin ng mga organizer ang plano nilang magtatag ng mga lokal na “Risa Na” chapters sa iba’t ibang lalawigan bilang bahagi ng pagpapalawak ng kilusan.

Panawagan sa Reporma

Ayon sa mga tagapagtaguyod ng kilusan, hindi lamang ito paghahanda para sa isang posibleng kandidatura kundi isang panawagan para sa mas aktibong pakikilahok ng mamamayan sa usaping pampulitika at pagpili ng mga lider.

Samantala, nananatiling wala pang pormal na pahayag si Hontiveros ukol sa kaniyang kandidatura sa 2028.

Sa mga naunang panayam, sinabi ng senadora na bukas siyang pag-aralan ang posibilidad ng pagtakbo kung ito ang magiging bunga ng pagkakaisa ng oposisyon at ng mga grupong nananawagan ng alternatibong pamumuno.