Pilipinas kinapos sa huling bahagi kontra Syria sa U23 Asian Cup qualifiers

Bigong mapasakamay ng Philippine Men’s National Football Team (PMNFT) ang buwena manong panalo matapos matakasan ng Syria sa halftime, 2-1, sa 2026 Asian Football Confederation (AFC) U23 Asian Cup Qualifiers nitong Miyerkules, Setyembre 3, sa Pamir Stadium, Tajikistan.

Dalawang minuto makalipas ang kasiyahan sa panablang 78th minute goal ni Midfielder Sandro Reyes, agad itong naunsyami nang rumesponde ni Mohamad Almustafa ng ikalawang goal na nagpanalo sa Syria.

“The U23 PMNFT played a tough match against Syria, losing 2-1. Kudos to the team for putting up a good fight!” saad ng Philippine Football Federation sa kanilang opisyal na Facebook page.

Mahigpit na depensa at matitinding tangka sa goal ang sumalubong sa magkabilang panig na nauwi sa scoreless na first half.

Matapos ang tahimik na first half, kumonekta ng left-footed strike mula sa right wing si Mahmoud Alaswad na dumaplis sa kamay ni Pinoy goalkeeper Nicholas Guimarães sa 61 minuto ng bakbakan, 1-0.

Nakabawi ang Pilipinas sa ika-78 minuto nang maipasok ni Reyes ang isang left-footed long-range shot upang maitabla ang iskor sa 1-1

Naging dagok din ang 19 fouls at tatlong offside ng PMNFT kumpara sa mas mababang anim na fouls ng Syria dahilan upang tuluyang maantala ang opensa ng Pinoy booters.

Tangan ang kauna-unahang panalo, ibinulsa rin ng Syrian Booters ang  ikalawang puwesto na sinundan ng host na Tajikistan sa Group K qualifying round.

Hawak naman ng Pilipinas ang ikatlong puwesto na may 0-1 kartada na sinundan ng Nepal.

Bunsod ng pagkabigo, kakailanganin ng Pilipinas na maipanalo ang kanilang dalawang fixture match kontra Tajikistan sa Setyembre 7, alas-12 ng umaga at Nepal sa Setyembre 9, alas-9 ng gabi para manatiling buhay ang kampanya sa qualification round.