Obiena, bigo depensahan Orlen Copernicus Cup title

Kinapos si Filipino pole vault star EJ Obiena sa pagtatangkang maidepensa ang kanyang titulo matapos magtapos sa ikaanim na puwesto sa ORLEN Copernicus Cup sa Toruń, Poland noong Pebrero 22.

Naabot lamang ng 30-anyos na two-time Olympian ang 5.65 metro bago nabigong lampasan ang 5.75m sa tatlong sunod na pagtatangka.

Ang naturang taas sana ang magbibigay sa kanya ng mas mataas na puwesto at magpapalakas ng tsansa upang makuha ang qualifying standard para sa World Athletics Indoor Championships.

Naiuwi ng Norway’s Sondre Guttormsen ang ginto matapos tumalon ng 5.85m, habang si American vaulter Christopher Nilsen ay nagtala ng 5.80m para sa pilak.

Para kay Obiena, mas mabigat ang naging resulta dahil kasabay nito ang paghahabol sa 5.90m qualifying mark bago ang Marso 8 cutoff upang makasiguro ng slot sa World Athletics Indoor Championships na gaganapin mula Marso 20 hanggang 22 sa Poland.

Bagama’t hindi naging sapat ang kanyang performance sa Toruń, nananatiling malinaw ang target ng Pinoy atleta na maabot ang 5.90m sa mga nalalabing kompetisyon bago ang deadline.

Habang papalapit ang cutoff, bawat torneo ay may kaakibat na presyon at halaga para kay Obiena na naghahangad muling makipagsabayan sa pinakamahuhusay sa indoor stage.

Tibay, tiyempo at consistency ang magiging susi para sa Filipino pole vault ace sa kanyang paghahabol ng isa pang world championship stint.