P802 milyon, iminungkahing ilaan sa pagluluklok ng higit 2K guidance counselors sa 2027

Nagbabalak ang administrasyong Marcos na maglaan ng ₱802 milyon sa 2027 upang makapagtalaga ng mahigit 2,000 guidance counselor sa mga pampublikong paaralan, bilang hakbang upang palakasin ang serbisyong pangkalusugan ng isip para sa mga mag-aaral, ayon kay House Minority Leader Marcelino Libanan.

‎

Ang pondo, na bahagi ng panukalang ₱7.2-trilyong pambansang badyet para sa 2027, ay magbubukas ng 1,800 bagong posisyon para sa school counselor associates at 221 school division counselor, habang lumalaki ang pangamba sa bullying at mga isyung pangkalusugan ng isip sa bansa, ayon kay ‎Libanan.

‎

Sinabi ni Libanan na dapat dagdagan ng pamahalaan ang paggasta upang mapalakas ang support system para sa bawat mag-aaral.

‎

Dagdag pa niya, “A child who is struggling should have ready access to a trained school professional who can listen and help.”

‎

Ang panukalang pondo sa ilalim ng Department of Education (DepEd) ay inilabas kasunod ng mga insidente ng karahasan sa mga paaralan, na nagdulot ng pangamba tungkol sa kaligtasan at kapakanan ng mga mag-aaral.

‎

Binigyang-diin ni Libanan ang kahalagahan ng maagang interbensyon upang matukoy agad ang mga babalang senyales at makapagbigay ng tulong bago lumala ang isang problema.

‎

‎“Early intervention is critical. We should be able to recognize warning signs and provide help before a problem becomes a tragedy,” pahayag ni Libanan.

‎

‎Ayon kay Libanan, ipinapakita ng mga insidente nitong mga nakaraang araw kung bakit hindi lamang dapat nakatuon ang pamumuhunan sa pisikal na seguridad kundi pati na rin sa emosyonal at sikolohikal na suporta para sa mga mag-aaral.

‎

Inilarawan din niya ang guidance counselors bilang bahagi ng “first line of defense” sa mga paaralan dahil nakatutulong sila sa paglikha ng mas ligtas na kapaligiran sa pamamagitan ng pagpapaunlad ng isang suportadong komunidad sa paaralan.

‎

Hinimok din ni Libanan ang mga pribadong paaralan na palakasin ang kanilang counseling services at makibahagi sa mga hakbang upang mapangalagaan ang kapakanan ng mga mag-aaral.

‎

Sinabi niya na ang kapakanan ng mga bata ay pananagutan ng lahat at dapat ding gampanan ng mga pribadong elementarya at high school ang kanilang bahagi sa pagprotekta sa mga mag-aaral.