YABAG RA ANG AGI SA SISTEMA

Giandaman naman naman unta’g kopya

gidaplisan rama’g kanta ang maong nota;

Kumpleto na pud ang kinatibuk-ang orkestra, 

Nya wa man diay hugti ang kwerdas sa sista. 

Sa atubangan sa katawhan nagpakaaron-ingon, 

Ang uban nga paglaum ra’y gigunitan intawon;

Naghulat sa dakong banda nga daw lingawon, 

Aron madunggan ang abig nindot paminawon. 

Nisaka sa entablado nga puno sa kompyansa,

Mitingog sa atubangan aron ang tanan mamasa;

Tibuok nasod naminaw sa pasundayag nga talagsaon

Apan yabag man diay gihapon ang talamdon.

Puno sa palakpak ang hawanan sa kongreso,

Bisan ang kanta layo ra kaayo sa tinuod nga berso;

Nindot paminawon ang mga saad ug plano,

Apan inig suta sa resulta, wa man nagkadimao. 

Nahuman ang pasundayag sa daw tigdumala,

Apan ang katawhan nagpabiling nahinganga;

Nya kanus-a man tawon ang kaning tinuod nga garbo?

Kung walahon mukanta ang naggunit sa mikropono.